Իսրայելցիները գործադուլ ու լայնածավալ բողոքի ցույցեր են կազմակերպել՝ պահանջելով ազատ արձակել Գազայի հատվածում պաղեստինյան իսլամիստական «Համաս» շարժման կողմից պահվող պատանդներին:
Ցուցարարները ճանապարհներ են փակել, այդ թվում՝ Թել Ավիվի գլխավոր մայրուղին:
Բողոքի ակցիայի մասնակիցները կոչ են անում կառավարությանը՝ անհապաղ դադարեցնել Գազայում պատերազմը, միջնորդել, որպեսզի պատանդներն ազատ արձակվեն և չեղարկվի Գազայում ռազմական գործողություններն ընդլայնելու որոշումը:
Օրեր առաջ Իսրայելի քաղաքական-անվտանգության կաբինետը հաստատեց Գազա քաղաքի վրա վերահսկողություն հաստատելու ծրագիրը:
DPA-ի փոխանցմամբ՝ Գազայում մնացած մոտ 50 պատանդներից, ենթադրաբար, մոտ 20-ը ողջ են։